Згодна з апублікаваным 7 жніўня паведамленьнем на сайце НПА, гэтае прадпрыемства ўдзельнічала ў абыходзе санкцый, накладзеных на беларускага вытворцу ўгнаеньняў «Гродна Азот».
Ведамства высьветліла, што ў студзені 2025 году ў ТАА «ГрандГраніт» зьмяніліся правы ўласнасьці, адрас і від дзейнасьці. Новым уладальнікам стала асоба, зьвязаная з ТАА «Тэхнаспэцтрэйдынг» і ТАА «Тэхнаспэцтрэйдынгэкспарт», што былі ўнесеныя ў санкцыйны сьпіс польскага МУСіА 18 сьнежня 2024 году.
Паведамляецца, што з сакавіка 2025 году ТАА «ГрандГраніт» арандуе невялікі склад непадалёк ад Менску «безь якіх-небудзь зьнешніх прамысловых збудаваньняў (трубаправодаў, зьнешніх рэзэрвуараў)». Кампанія валодала абсталяваньнем для прыгатаваньня вадкіх комплексных угнаеньняў для сельскагаспадарчага выкарыстаньня.
«Пры гэтым ТАА «ГрандГраніт» пазначыла, што вытворчасьць угнаеньняў ажыцьцяўлялася на заводзе «Гродна Азот», і выкарыстоўвала яго інфраструктуру. Тавар адгружаўся з Горадні, а ТАА «ГрандГраніт» мела дзелавыя кантакты з «Гродна Азот», што сьведчыць пра тое, што фактычным вытворцам гэтага тавару зьяўлялася «Гродна Азот», — лічаць у Варшаве.
Гэта ўжо сёмы суб’ект гандлю ўгнаеньнямі беларускага вытворцы «Гродна Азот», які МУСіА на прапанову НПА ўнесла ў нацыянальны санкцыйны сьпіс.
Уключэньне ў гэты сьпіс азначае, што да фізычнай або юрыдычнай асобы прымяняюцца такія абмежавальныя меры (усе ці некаторыя), як
- «замарожваньне фінансавых сродкаў і эканамічных рэсурсаў»,
- «забарона на наданьне фігуранту пераліку або таму, хто дзейнічае ад яго імя, — наўпрост ці ўскосна — якіх-небудзь фінансавых сродкаў або эканамічных рэсурсаў»,
- «забарона на сьвядомы і наўмысны ўдзел у дзеяньнях, мэтай або вынікам якіх зьяўляецца абыход» санкцый,
- «выключэньне з працэдуры дзяржаўных закупак або конкурсу»,
- «унясеньне ў рэестар іншаземцаў, знаходжаньне якіх на тэрыторыі Польшчы непажаданае».
На сайце ТАА «ГрандГраніт» пазначана, што з траўня 2025 году прадпрыемства само зьяўляецца вытворцам азотных угнаеньняў. Офіс знаходзіцца ў Менску, вытворчы цэх — у Фаніпалі (Дзяржынскі раён Менскай вобласьці).
8 траўня кампанія паведамляла, што «ў рамках афіцыйнага візыту, узгодненага з упаўнаважанымі дзяржаўнымі органамі», вытворчае прадпрыемства «наведаў ганаровы госьць: Кшыштаф Талвіньскі, старшыня парлямэнцкай партыі „Фронт“ Рэспублікі Польшча і член Саюза аграрыяў Польшчы».
Талвіньскі зьяўляецца прыхільнікам Аляксандра Лукашэнкі і прэзыдэнта Расіі Ўладзіміра Пуціна.
- 22 ліпеня Варшава ўвяла санкцыі адносна кіроўнай кампаніі холдынгу «Беларуская цэмэнтная кампанія».
- 9 ліпеня стала вядома, што Польшча ўвяла санкцыі ў дачыненьні да беларускага бізнэсоўца Аляксандра Машэнскага.
- Некалькімі днямі пазьней зарэгістраваная ў Казахстане кампанія QARTREE LLP, за якой стаіць Беларусь, была таксама ўнесеная ў санкцыйны сьпіс за экспарт расейскай і беларускай фанэры.
Што варта ведаць пра цяперашнія санкцыі супраць Беларусі
2020 год
Краіны Эўразьвязу, ЗША, Канада, Вялікая Брытанія і Японія пачалі ўводзіць санкцыі супраць Беларусі пасьля жорсткіх разгонаў акцый пратэсту супраць фальсыфікацыі вынікаў прэзыдэнцкіх выбараў у 2020 годзе. Да гэтых і наступных санкцый далучаліся таксама іншыя краіны, у тым ліку партнэры ЭЗ.
Першапачаткова гэта былі пераважна візавыя абмежаваньні і замарожваньне актываў для чыноўнікаў рэжыму Аляксандра Лукашэнкі і для іншых асобаў, падазраваных ва ўдзеле ў рэпрэсіях і фальсыфікацыях выбараў.
2021 год
Эўразьвяз увёў эканамічныя сэктаральныя санкцыі пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф’і Сапегі, а таксама з прычыны парушэньняў правоў чалавека і рэпрэсій.
Сярод іншага, Эўразьвяз тады ўвёў абмежаваньні на імпарт беларускіх калійных угнаеньняў і забараніў палёты ў паветранай прасторы ЭЗ а таксама доступ да аэрапортаў ЭЗ усім беларускіх авіякампаніям. Эўрапейскім авіякампаніям таксама забаранілі авіяперавозкі празь Беларусь.
Злучаныя Штаты, Вялікая Брытанія і шэраг іншых краінаў таксама ўвялі падобныя эканамічныя санкцыі пасьля інцыдэнту з самалётам Ryanair.
У сьнежні 2021 году Эўразьвяз увёў пакет санкцыяў у сувязі зь міграцыйным крызісам, абвінаваціўшы афіцыйны Менск і Маскву ў «гібрыднай агрэсіі» супраць ЭЗ і выкарыстаньні нелегальнай міграцыі як зброі. Новыя санкцыі ЭЗ тычыліся 17 фізычных і 11 юрыдычных асобаў, чые актывы замарожваліся. Падобныя ж санкцыі тады ўвялі ЗША, Канада і Вялікая Брытанія.
2022-2025 год
У лютым 2022 году расейскія войскі скарысталі тэрыторыю Беларусі для ўварваньня ва Ўкраіну, а ў першыя месяцы поўнамаштабнай вайны яны выкарыстоўвалі беларускую тэрыторыю для абстрэлу Ўкраіны.
У сувязі з гэтым у лютым 2022 году пра новыя санкцыі супраць Расеі і Беларусі абвясьцілі ЗША, Канада і Эўразьвяз. Гэтыя санкцыі тычыліся шэрагу беларускіх чыноўнікаў, вайскоўцаў, а таксама прадпрыемстваў. Цягам наступных месяцаў, свае аналягічныя санкцыі ўводзілі Карэя, Японія і шэраг іншых краінаў.
Ад 2022 году ў сувязі з удзелам рэжыму Лукашэнкі ў расейскай агрэсіі супраць Ўкраіны Эўразьвяз зрабіў яшчэ больш за дзясятак санкцыйных крокаў адносна Беларусі. Мноства санкцый увялі таксама ЗША ды іншыя краіны. Сярод крокаў Эўразьвязу былі наступныя:
- 9 сакавіка 2022 году Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
- 3 чэрвеня 2022 году ў санкцыйны сьпіс Эўразьвязу былі ўключаныя: кіраўнік ЦВК Ігар Карпенка, сыны бізнэсоўца Аляксея Алексіна Дзьмітрый і Віталь, сэрбскі бізнэсовец Багалюб Карыч, які меў інтарэсы ў Беларусі, пракурор Дзяніс Мікушаў, судзьдзя Мікалай Доля, былы кіраўнік ГУБАЗіКу Андрэй Паршын, генэральны дырэктар «Беларуськалію» Іван Галаваты, а таксама прапагандысты Ігар Тур, Андрэй Сыч, Людміла Гладкая і Рыгор Азаронак. Таксама ЭЗ ухваліў адключэньне ад SWIFT «Белінвестбанку» і ўвёў новыя санкцыі супраць Беларуськалію, Беларускай калійнай кампаніі, «Інтэр-Табака», «Нафтана», Гродзенскай тытунёвай фабрыкі «Нёман», Белмытсэрвісу, Белкамунмаша і Белтэлерадыёкампаніі.
- 3 жніўня 2023 году ЭЗ дадаў у санкцыйныя сьпісы яшчэ 38 асобаў — пераважна судзьдзяў і начальнікаў калёніяў, а таксама прапагандыстаў Вадзіма Гігіна і Ксенію Лебедзеву. Пад санкцыі трапілі і тры прадпрыемствы — Белнафтахім, ААТ «Менскі электратэхнічны завод» і ААТ «БМЗ — кіроўная кампанія холдынгу „БМК“»
- 29 чэрвеня 2024 году Эўразьвяз распаўсюдзіў на Беларусь санкцыі, якія да таго ўвёў супраць Расеі. У прыватнасьці ЭЗ абмежаваў пастаўкі шэрагу відаў прадукцыі і тэхналёгій падвойнага прызначэньня, якія маглі перадавацца ў Расею празь Беларусь. Гэта тычылася тавараў і тэхналёгій, зьвязаных са сфэрай абароны і бясьпекі, а таксама агнястрэльнай зброі і яе кампанэнтаў. Таксама ўвялі забарону на імпарт зь Беларусі золата, алмазаў, гелію, вугалю, сырой нафты, каб Беларусь не рабіла рээкспарту з Расеі забароненых тавараў.
- 24 лютага 2025 году ў 16-ы пакет санкцыяў Эўразьвязу было ўключанае беларускае прадпрыемства «Інтэграл» — вытворца паўправаднікоў, інтэгральных схемаў і іншай высокатэхналягічнай прадукцыі.
- 27 сакавіка 2025 Эўразьвяз увёў санкцыі яшчэ супраць 25 фізычных і 7 юрыдычных асоб Беларусі. У санкцыйны сьпіс, у прыватнасьці, трапілі Цэнтральная выбарчая камісія Беларусі, РУП «Беларускія лятарэі», ТАА «Рыдота», ААТ «Плянар», РВУП «Завод дакладнай электрамэханікі», а таксама ТАА «Цыбулька-Бел» з аграгарадку Гуды Лідзкага раёну (Горадзенская вобласьць). Уладальнікам «Цыбулькі-Бел» зьяўляецца дэпутат фэдэральнай зямлі Саксонія ад ультраправай партыі «Альтэрнатыва для Нямеччыны» Ёрг Дорнаў, якога падазраюць у выкарыстаньні працы беларускіх палітвязьняў. Сярод асобаў пад санкцыямі апынуліся кіраўнікі вышэйназваных прадпрыемстваў, судзьдзі, чальцы ЦВК і партыі «Белая Русь».
Форум